Salta al contenuto

A ITE CANTADES

E nd’hazis aju bois de piulare

cantendemi sas gioias de sa vida,

e aju nd’hazis de mi consolare

ponzendemi durzura in sa ferida.

Cagliade chi tant’’eo no bos asculto,

mudas, puzzones fizas de s’eranu

ca da e meda tantu no esulto

ch’in coro hapo dolore fittianu.

Ite mi cantas tue columbina

cun tonu tantu triste e isconsoladu,

no l’ischis chi m’ammentas Catherina

chi fit s’amore meu appena nadu.

E tue chi mi cantas furfurarzu

cun insistenscia in cussu fumajolu,

all’ischis chi su mundu est faularzu

chi pius de cuntentesa ti dat dolu.

Pro chie cantas tue cardeglina

bolende in cussas tancas in fiore

cun sa cumpanza tua sempre ‘ighina

a ciulos de gioia e de amore.

Ite mi cantas tue rusignolu

iun custa notte de lughente ‘eranu

no l’ischis tue chi pius no pesat bolu

sa ch’istringhiat forte custa manu.

E bois, cuccu, istria e zurulia

chi funestu mi cantades s’ammentu

de un’iscampiu de sa vida mia

chi in una tumba ch’hat giuttu s’eventu.

Issa fit fiza de s’estremu norte,

prenda dechida de sa Finlandia,

a seighi annos l’incontreit sa morte.

Cun issa mi morzeit donzi poesia.

Please follow and like us:
Published inUncategorized

Sii il primo a commentare

Lascia un commento

Il tuo indirizzo email non sarà pubblicato. I campi obbligatori sono contrassegnati *