Salta al contenuto

BAE CANTONE MIA

Anda e bae cara cantone mia

anda tue un notas de paghe

e in sos cuzolos de su mundu faghe

chi tintinnen campanas de allegria.

In ue b’hat pena sana su dolore

de custu mundu a bortas succuttadu

de dolimosas lagrimas bagnadu.

Giughebi, cantu meu tantu amore.

In sas bujas e aranzoladas mentes

chi drommin’intro de tanta nuddesa,

ne gioin mirende ‘e Deus sa mannesa

pro sempre torren sos pensos ardentes.

E bae cantone mia, bae cuntenta

navighende in mares de tempesta

chirca chi est fuidu in sa foresta

de sas malesas, che fera mai tenta.

Frimmadi in sos coddos de su ‘entu

e in logos de miseria, isperiende,

cunsola totu sos chi sun pattende

chi jompan a lograre carch’intentu.

Passende in sos caminos de sa vida,

s’abbojas a chie dadu m’hat amore,

da e parte mia, dali unu fiore

pro ricumpenscia ‘e sa gioia retzida.

Si passas in Limbari, cantu meu

bolende tra columbas e astores,

canta umpare a totu sos pastores

cantos de paghe e cantigos a Deu.

Cantone mia, tocca in donzi logu

ue b’hat bisonzu de serenidade,

mutza dezisa ‘onzi malignidade

chi torret bonumore e disaogu.

E s’ides sambenende una ferida

carrarzala de ‘asos e dulzura,

sas gherras finen e sa disaura

ca tantas vidas happidu han perida.

Oh!!! Cantone, torra a mi contare

si su pagu ch’hapo hat fattu effettu.

Torra in coro meu e cun affettu

hap’a sighire ancora a ti cantare.

Please follow and like us:
Published inPoesie in lingua Sarda

Sii il primo a commentare

Lascia un commento

Il tuo indirizzo email non sarà pubblicato. I campi obbligatori sono contrassegnati *