FURAS LEGALIZZADAS

S’Istadu hat in manu un’istrumentu, a narrer pagu, diabolicu, pro faghere su ‘inari a sa lestra. Sa possibilidade de dare multas, contravvenziones e penalidades a totu cussos chi pro unu motivu o pro un’ateru, segundu isse, no rispettana totu sas legges chi che sunu. Happende puru su vantaggiu de haer sempre rejone, proite guasi nisciunu est in gradu de connoschere custas legges e supra a totu a la comprendere.

Ischimus cun zertesa chi sas naziones ziviles hana chimbe o ses mizza legges in totu. In Italia paret chi siana chentusessantachimbe mizza. Sa montagna de decretos e disposisciones de sa leggislascione italiana est diventende tantu alta chi podet essere paragonada no a una regula jara de articulos cumprensibiles o a unu prontuariu de facile consultascione, ma a unu lorumu trobojadu, tantu chi nisciunu nd’agattat pius su cabu. Disposisciones bezzas de carchi seculu, inutiles e mai abrogadas, resultana misturadas, innestadas, tappuladas e confusas cun legges chi naschene die pro die, chena pasu, e infultini sempre de pius sos ruarzos de sos codices in ue s’agattat misturadu de totu.

Pro chircare, adattare e intrepetare sa disposiscione chi nos bisonzat pro fagher baler carchi olta sa rejone nostra, o una giustificazione, o pro poder manovrare una causa, bi che rene espertos de abbistura rara in fattu de preparascione, de cultura e de maliscia. Avvoccados in gradu de chircare e de de connoschere no solu sa disposiscione primaria, ma totas sas annanghiduras e i sas sentenscias intrepetativas

bennidas a traviare su significadu originale ‘etzu. Custos in Italia si poden contare in sos poddighes de sas manos, pagados naturalmente a pesu de oro.

Chi hat carchi problema e no si podet permittire de s’obera de custos, podet istare zertu chi puru appende rejone, l’hat a toccare sempre de pagare.

Omissis………… battordighi terzinas

Oh… Deus meu faghe chi no pene

chi già carch’ingiustizia m’est toccada

e malos pensamentos sempre frene.

Tantu caminu fatt’hapo in pigada

isgrunciende a bortas in bruncones

bene cuados a s’abbaidada.

Oh… s’ischedas cantas avversiones

han superadu in custa vid’ andende

sas santas e raras beneisciones.

No crettedas chi sia burulende

ca s’allegria oe no hapo in vena,

so solu carchi cosa cunstatende.

Chen’isbriones sicca est s’alguena

pro totu cussu chi no hapo nadu

ma su chi penso l’iscrio cun pena.

Zertu ch’hapo coraggiu e bona lena

e no cuo sa vida in s’omertade

de carchi ipocrisia ch’est cadena,

de s’esistenscia fatta ‘e veridade,

chena s’isgonza ca no b’’ido male

de ponner donzi cosa in giaridade.

Bos conto eo sa cosa tale e cale

in sa manera comente da ‘ido

candida cun ispetia e cun sale.

A iscumbattare totu bos isfido

si merito un’aizu e attenzione,

a su pastu ‘e sas beffas bos cumbido.

Ca m’’ido sempre intro sa passione

de onzi cosa fatta cun impignu

che bonu cristianu in devozione

Ma in custa terra ‘e genere malignu

cun su proffittu de tanta bontade

han mandadu in malora onzi dissignu..

//

Custa orta in sa disonestade

de cust’Istadu chi cun manu lestra

fattu de zente ‘e dubbia calidade,

su chi ti dan’ a manca leant a destra

totu cunfromma a sas legge sovrana

ti furan dai su piattu sa minestra.

Dignos pappones de sa razza umana

frazzigos fruttos de democrazia,

fintos de onore in sa terra romana.

Arrogantes de sa burocrazia

de tota s’erva nde faghides fasciu

paschidos ‘elmes intro ‘e abbùndanzia.

Hana furadu fin a bier s’isfasciu

omines chi parian ezzellentes

ruttos che sunu in su fossu pius basciu.

Mancu s’istoria de antigas zentes

italicas, chi dadu han sa cultura

a su mundu, luminosas mentes,

movet s’orgogliu chi pro sua natura

capazidade dad’a onzi populu

continidade e sabiesa madura.

Fizu eo puru so‘e custu seculu

chi m’hat bidu già sessantottinu

isperansciosu de carchi meraculu.

Fora de mala ura e disattinu

pro nudda e a sa muda hapo lottadu

chena dare mezzoru a su destinu.

S’ammentet però chi hat ismentigadu

cussu poeta, chi no fatto nome,

a sos sardos su cantigu accoradu,

e inoghe naro, pro ch’impulsos dome

chirchet de moderare onzi Barone

sa tirannia de cust’istajone.

In su malu guvernu e confusione

sos partidos fattende sun’ a gara

pro carchi premiu, de mannu furone.

Si nettan e si samunan sa cara,

pro s’inventare ateru sistema

cun manos de carchina a tinta giara .

Biad’a chie no si ponet problema

e campat coment’andadat, a sa zega

a s’umbra de bandera chen’istema.

Consumida sa vida, ispera e prega

chi peus de gosi no potat andare

pro no tancare in totu sa bottega.

Omissis……. doighi terzinas.