Salta al contenuto

IN BIDDA MIA

Truncadu est custu coro da e sa pena

a su pensare a tantas cosas caras,

sas chi mi curren intro ‘e ‘onzi vena

e in mente mia sun che prendas raras.

Su tempus medas cosas s’hat furadu,

ma nudda m’hat toccadu sos ammentos

restados bios in custu coro umbradu,

chi remonzo che sacros monumentos.

Ranchidos rios de turmentosu piantu

s’abbarran frimmos in sos ojos mios,

e cun sa pena de attittosu cantu

m’intristan sos sentidos pius bios.

Est custu lagrimosu prologare

pro ponner in resaltu s’amargura

chi oe mi dat motivu de isfogare

s’isconsolu chi hapo pro natura.

Custa penosa umbra de lamentu,

si ‘olat malinconica in s’aera,

da e coro meu e da e su pensamentu

si frimmet in Limbari, cun s’ispera.

Ca in cussu monte de sa ‘idda mia

ismentigada che sagrada grutta,

isalenende s’ultima poesia,

una pinnetta morit, mesu rutta.

Battor muros de pedra limbaresa,

in terra traes, teulas e canna,

pedra lana, rualzos e malesa

cuan cussa pinnetta tantu manna.

Che niccios de una cheja iscunsagrada

bi restan duas arulas crabinas,

una giaghitta ‘e linna isgiaulada,

carchi lama e duas betzas cadinas.

Niunu pensat in cale abbandonu

est cussa domo morta, in Littu Siccu,

niunu nos preservat cussu donu,

niunu post’ancora b’hat afficcu.

Eppuru, in cussu bicculu ‘e Parnasu

pesende sos pius altos pensamentos,

sabiu testimonzu ‘e sos eventos,

nientemancu, bi crescheit Pedru Casu.

Please follow and like us:
Published inPoesie in lingua Sarda

Sii il primo a commentare

Lascia un commento

Il tuo indirizzo email non sarà pubblicato. I campi obbligatori sono contrassegnati *