Salta al contenuto

MARTIRES DE SARDIGNA

Sardigna mia de martires piena

pro tantos seculos arrennegada

pattidu has cun dolore morte e pena.

Pro donzi gherra in terra tua falada

in sa conchistas de ratzas anzenas,

a ferru, donzi pedra han bortulada.

Dende a donzi Sardu tantas penas,

feniciu, punicu, moro e romanu,

t’han pistadu che rios in piena.

Pro ti leare da e terra su ranu

de trigu tribagliadu cun suore

leadu t’han su pane dai manu.

Pro ti ‘attire iscunfortu e dolore

su vandalu dai logu lontanu

in terra hat semenadu su terrore.

De Barbaru, martiriu turritanu,

de Brotu, Januariu e de Gavinu

bocchidos cun sa rughe santa in manu.

E Ampsicora, istoccadu in su ‘entinu

pro sa morte de Josto bida in ojos,

mortu e cattigadu in su caminu.

Cantas gherras e malos abbojos

has fattu, in s’istoria caras noas

feas e truzes che ruspos de pojos.

Cun sos de Ispagna has pijadu sas coas,

cun sos Asburgicos fist in terrore,

che cuba chena chilcios e ne doas.

Mortas ismentigadas chentza onore

sas chimbichentas salmas de Cuguttu

totas messados dae su ‘inchidore.

Pro sos Barones sambene e luttu

pattidu has cun sa rassignascione,

ma s’ardimentu, sa olta has alluttu.

Puru attesu, donzi malaiscione

t’est bennida che abbile abbramida

a mastigare carres de prejone.

In Redipuglia, Lepantu e Crimea

e in donzi logu, fizos de Sardigna,

drommide in paghe, fora ‘e ‘onzi pena.

Please follow and like us:
Published inPoesie in lingua Sarda

Sii il primo a commentare

Lascia un commento

Il tuo indirizzo email non sarà pubblicato. I campi obbligatori sono contrassegnati *