Salta al contenuto

NASCHENDE A NOU

Si nasco a nou como bos lu naro

hap’a impittare tota sa pascenscia

bidu chi no mi mancat s’isperienscia

e donzi die custa vida imparo.

Cominzo dai minore a dubitare

ch’in giru che siat tanta zente ‘ona,

ca mancu si la ‘ido a cara prona

niunu mi diat poder inganniare.

De feminas mancu a nde mentovare

pro no ponner su coro in carre anzena,

ma si pro casu suffro ‘e custa pena

a chitto o tardu già m’hat a passare.

E custa ‘olta no poto faddire

ca in sas magagnas già bi so passadu

crettende a cantas folas m’han contadu

chi in bona fide m’han fattu pattire.

Totu sos furbos cheria abbojare

retzendelos cun carchi risigheddu

ischende como, su ch’han in cherveddu

zertu chi no mi poden pius trampare.

Sos bonos, incontrare los cheria

pro leare cunsizu a coro abbertu

chenza timore e a visu iscobertu

fidendemi ca in ojos han giaria.

Abbojende sos males de su mundu

carchi cunsizu como poto dare,

milli fastizos che poto evitare

bidu chi los conosco fin a findu.

Sa domo, mi la fatto in un’altura

attesu da e rumores e fragassu,

de sas malesas fatto un’accumassu

e in fundu meda lis dao sepultura.

Mele, Murenu e Bustianu Satta,

Pedru Casu, Mossa e Montanaru,

do contivizu a sas frunzas de laru

illusu ‘e che sighire de issos tratta.

Como so fattu ‘e custa calidade,

duas puddas, una craba e un’aineddu,

un’ortu, unu ‘attu e unu cateddu

pro no istare in tota solidale.

Ite bellu, essende custu abberu,

paritzas cosas podia cambiare,

ma, est mezuz che la fina ‘e mi bisare,

custos disizos, fruttos de misteru.

Please follow and like us:
Published inPoesie in lingua Sarda

Sii il primo a commentare

Lascia un commento

Il tuo indirizzo email non sarà pubblicato. I campi obbligatori sono contrassegnati *