Salta al contenuto

REPOSA IN SANTA PAGHE (Pro Antoni Chessa “poeta” )

REPOSA IN SANTA PAGHE [ Antoni Chessa]

Dolina manna ch’hapo intro su coro

in qusta die penosa de isconsolu

t’hapo perdidu Antoni, unu tesoro

como est mancadu, lassadu m’has solu.

M’han a mancare s’estru e su decoro,

sas rimas bellas ch’han leadu ‘olu

pighende in altu cun sa sorre morte

ca de s’eternu fit dissignu ‘e sorte.

Passadu hapo sas dies imbarende

De retzire sa puntuale risposta

Chi mi daias de coro e coitende

Che doverosu deppidu a sa posta.

Mi contaias cantu fist penende,

de cantu su dolore in pes e conca

t’haiat trazzad’intro s’ultimu ierru

mujende un omine chi fit de ferru.

Cantas folas pro ti consolare

T’hapo contadu cun rima cortese

ancora vida creia de ti dare

cando su male ballait in pese.

E naro chi no t’hapo a ismentigare,

intro ‘e coro intreu tue mi sese

e cantu Deus mi lassat in sa vida

hap’haer ammentu ‘e persona decida.

Già b’hap’a bennere a sa tumba tua

cun dolu mannu in cue a ti pregare

e unu fiore ‘e Desulo a s’accua

in cussa losa fritta hap’a lassare.

Pasa Antoni, finida est sa fua,

pasa in chelu e sighi a poetare

in cumpanzia de sos poetas caros

chi ti chintein sa fronte ‘e friscos laros.

Saluda Pedru Casu e Montanaru

ch’in terra fin sos tuos predilettos,

iscrive pro Deus ancora versu caru

cun sa paghe suprema ‘e sos elettos.

Lassalu a nois custu caminu amaru,

barrios de tribulias e diffettos.

Antoni Chessa caru, ite dolore

chi dadu m’has , posca de tantu onore.

Propriu a mie haias destinadu

de imbiare s’ultimu tou cantu,

pro cantu mi nde senta onoradu,

no est cosa de mi nde dare ‘antu.

Sa dispidida cun tonu accoradu

ch’istrintu m’hat su coro tantu e tantu

siat de ghia pro sos undighi fizos

chi has educadu e creschidu che lizos.

Reposa amigu caru, in paghe santa.-

Please follow and like us:
Published inPoesie in lingua Sarda

Sii il primo a commentare

Lascia un commento

Il tuo indirizzo email non sarà pubblicato. I campi obbligatori sono contrassegnati *