Salta al contenuto

SA FORTUNA

Cando a minore edade ‘eo creia

chi a su barattu sa Dea Fortuna

si podiat comporare in donzi via,

mi pariat de che toccare sa luna.

Su pappagallu chi ischiat totu

sa fortunada sorte in su bigliette

comente unu chi m’hat già connotu

mi naraiat ch’haia annos sette.

Chi tanta gloria fit de me in isettu,

sa vida mia tota un’ajubore,

ricchesa e fama in su longu trettu

e chimbe fizos totos a duttore.

Finu a chent’annos mai maladia,

chena malannos e francu de morte,

onores milli e annos de biadia,

attesu de penas e malasorte.

Ma sa fortuna zega no est iscritta

in misereddos foglios de pabiru,

la sutzamus cun su latte ‘e sa titta,

cantu campamus nos leat in giru.

E nd’hamus nois de andare faghe faghe

peri su mundu a trazare sa vida

istringhende intro ‘e punzos su tenaghe

de fumu, chena ‘ier sa fiamarida.

Ma si ti passat una die accantu

e t’agattat già prontu e ischidadu

sos ojos lutzigos chena piantu

e a sa mediocridade cundennadu,

Leala a bolu chena la faddire

ca est majarza e curret che i su ‘entu,

dai manos no che la fattas fuire,

pro su restu ‘e sa vida ses cuntentu.

Ma puru penso, cust’est isperienzia

chi trabagliende onestu e penende,

faghes su tantu ‘e campare in decenzia

ca sas ricchesas si faghen furente.

Please follow and like us:
Published inPoesie in lingua Sarda

Sii il primo a commentare

Lascia un commento

Il tuo indirizzo email non sarà pubblicato. I campi obbligatori sono contrassegnati *