Salta al contenuto

SAS MANOS MIAS HAN SESSANT’ANNOS

Pensende a su passadu “ite salassu”

mi so assentadu a s’umbra de unu frassu,

de ammentos hapo fattu un’accumassu.

//

Sa vita mia tota in cussu giassu

che in un’ispiju mannu ch’hapo ‘ido,

gioias, amores, males e fragassu.

Da e s’isfortuna a bortas perseguidu,

pius de una ‘olta cun rancore e dolu

sas culpas hapo dadu a su destinu.

Si in sos onores, pesad’hapo ‘olu

lassende in terra totu sos malannos

in manos m’est restadu su picciolu.

Mirendemi sas manos e i sos dannos,

seghende sa memoria perra perra,

como m’abizzo chi hana sessant’annos.

Han paliadu chimeras de terra,

de oro e ludu su prammu imbruttadu

e milli armas prontas pro sa gherra.

Sa pinna medas bortas han leadu,

no sempre cosas tristes e dolore

han’iscrittu a pessonas ch’hapo amadu.

Han connotu sas gioias de s’amore,

istrintu ateras manos in adiu

e lughe atzesa in carch’iscurigore..

Cantas bortas perdidu hapo briu

cando carchi passione hapo lassada

ma sempre in coro so restadu biu.

Donzi ‘olta, pro me un’istoccada,

cun sa pascenscia ‘e cominzare a nou.

Briasa mia, in ses andada!!!.

Sa conca mia umpida fit che ou

a s’allegria haia fattu giaddu,

ma como, in su carcanzu giutto tzou.

So diventadu ispinas de rueddu

e si bi so andadu a sa pesuda

com’hapo appasigadu su cherveddu.

Frimmu, pasadu e cagliadu a sa muda,

cun pensamentos e curende fizos

sos pes ‘eo ch’hap’in s’abba che i sa uda.

//

Cando a su nidu istraccu so torradu

a domo, totu los haio in tundu,

peregrinende in giru pro su mundu,

muzere e fizos hapo carignadu.

Cun s’uniforme sempre ben’’estidu

pro dare lustru a cust’Italia mia,

no m’est bessida mai una poesia

in onore, ispendia su sentidu.

Navighende in mares agitados,

sulciede notte e die mares frittos,

pro sa Patria ‘e dovere e de dirittos

sos menzus annos si che sun’ andados.

Sa paga cosa chi s’Istadu hat dadu

su sacrifiziu meu no hat pagadu,

de manos mias su zelu ismentigadu,

carchi dirittu forsi m’han furadu.

Cun custas manos mias già imbetzadas,

cun su pianu in sa toccada e fua

su poddighe hapo postu intro sa bua

e in carchi pija ‘ettadu hapo s’ojada.

Han cumpostu cantones a s’accua

inciapuiddas cun boghe e chiterra,

cun carchi istrunzu sempre in cuntierra

ca s’abba giara mia poniat a lua.

Poveras manos mias cant’han toccadu

sas gioias e i sas penas de su mundu,

pro donzi cosa onesta han cumbattadu

palpende paradisu e inferru fundu.

Please follow and like us:
Published inPoesie in lingua Sarda

Sii il primo a commentare

Lascia un commento

Il tuo indirizzo email non sarà pubblicato. I campi obbligatori sono contrassegnati *